Qarshiliklar yangi mavsumga tayyorgarlikni yangi yildan keyin boshlashdi. Uch bosqichda tashkil etiladigan o`quv-mashg`ulot yig`inlarining dastlabkisi Qarshida o`tgan edi, ikkinchisi ayni paytda Turkiyaning Belek shahrida davom etmoqda.
Safar oldidan “ajdarlar” Toshkentda “So`g`diyona” jamoasiga qarshi to`rtoqlik uchrashuvi doirasida maydonga tushdi va 3:0 hisobida g`alaba qozondi. 22 yanvarga qadar o`tadigan yig`in doirasida ham bir necha o`rtoqlik uchrashuvlari tashkillashtirish belgilangan. Shulardan dastlabkisi 12 yanvarda mahalliy “Tarsus Idman Yurdu” jamoasiga qarshi o`tkazildi va qarshiliklar 2:0 hisobida g`alaba qozonishdi. Ketma-ket ikki kunda tashkillashtirilgan ikkita uchrashuvda esa omad raqib jamoalar tomonida bo`ldi: 13 yanvarda Ukraina premer-ligasi turnir jadvalining 3-pog`onasida borayotgan Poltava shahrining “Vorskla” jamoasi bilan 1:2, Qarag`anda shahrining “Shaxtyor” jamoasi bilan 0:2. Jamoa 15 va 16 yanvar kunlari belgilangan reja asosida mashg`ulotlar o`tkazdi. Ro`ziqul Berdiev shogirdlari bugun “Lyuftetari” (Albaniya), ertaga esa “Mariupol” (Mariupol, Ukraina) jamoalari bilan nazorat o`yinlari o`tkazishni rejalashtirgan.
Turkiya safaridan qaytgan jamoa a`zolari uchinchi bosqichda yig`inni o`z qarorgohida davom ettirishadi va 30 yanvar kuni Qarshidagi “Markaziy” stadionda Osiyo Chempionlar Ligasi pley-off bahsida Iordaniyaning “Al-Faysaliy” jamoasini qabul qiladi. O`yin 16.00da boshlanadi.
Shu kungacha jamoaning olti nafar tajribali futbolchilari - Bahrom Abdurahimov, Farruh Sayfiev, Dilshod Rahmatullaev, Akmal Shorahmedov (“Paxtakor”ga), Shaxboz Erkinov (“Buxoro”ga) Qarshini tark etishdi. Aksincha, “So`g`diyona” klubidan yarim himoyachi Sanjar Rashidov, Tojikistonning “Istiqlol” klubidan yarim himoyachi Jahongir Aliev, “Metallurg” klubidan yarim himoyachi Murodjon Toshmatov va himoyachi Mirg`iyos Sulaymonov esa kelgusi faoliyatini “Nasaf”da davom ettirishni ma`qul ko`rishdi. Shuningdek, klubning yoshlar ligasida, 1-ligadagi “Nasaf-2” jamoalarida to`p tepayotgan, klub qoshidagi futbol Akademiyasida tarbiyalanayotgan bir necha nafar yoshlar ham tarkibdan joy olishgan.
Jamoa yangi mavsumda an`anasiga ko`ra bosh homiysi – “Sho`rtangazkimyo majmuasi” brendi ostida oq, ko`k va qizil rangdagi sport kiyimlarida maydonga tushishni rejalashtirgan.
