O`zbekiston Futbol Federatsiyasi yurtimizda futbolni yanada rivojlantirish borasida keng ko`lamli islohotlarni amalga oshirmoqda. Bunda futbolning ommaviyligini oshirish hamda muxlislar bilan ishlashni takomillashtirish orqali stadionlarimizga ishqibozlar tashrifini ko`paytirish asosiy maqsad qilib olingan.
Qayd etish joizki, ayni damda xalq va ishqibozlar bilan muloqot ko`priklarini yanada ko`paytirish bo`yicha chora-tadbirlar ishlab chiqilmoqda. Endilikda “GoUzbekistan” loyihasi muallifi Fazliddin Hojimuhammedov O`FFning muxlislar bilan ishlash bo`limida aynan manashu yo`nalishda faoliyat olib boradi. U yurtimizda muxlislik madaniyatini yanada shakllantirish, muxlislarning stadionlarga tashrifini orttirish, ularni qiynayotgan jihatlarni bartaraf etish hamda ishqibozlarning talab va istaklarini O`FF rahbariyatiga etkazishda asosiy ko`prik vazifasini o`tab beradi.
Tez orada har bir professional klub muxlislar jamoalari a`zolari hamda etakchilari bilan uchrashuvlar o`tkazib, ularning talab va istaklarini yanada batafsilroq o`rganib chiqish rejalashtirilmoqda.
Shu maqsadda dastlab Toshkent shahri klublari, keyin Farg`ona vodiysi va boshqa hudud sharafini himoya qiladigan klublar muxlislari etakchilari bilan uchrashuvlar bo`lib o`tadi.
