O‘zbekiston Superligasi 8-turi doirasida o‘z maydonida Neftchi klubini minimal hisobda mag‘lub etgan Navbahor klubi ustozi Samvel Babayan g‘alaba haqida o‘z fikrini bildirdi.
Bugun muxlislarimizni g‘alaba bilan xursand qilishni istagandik. Qolaversa, bugungi o‘yin Namanganda boshlangan gullar festivali bilan bir vaqtga to‘g‘ri keldi. G‘alaba bilan muxlislarimizni ikki karra xursand qila oldik. Bugun bizga kuchli jamoa raqiblik qildi. Bugungi o‘yin uchun ularga ham rahmat. Bugun Neftchini qo‘llab-quvvatlash uchun kelgan farg‘onalik muxlislarga ham rahmat. Ajoyib atmosfera, bunaqasi hali bo‘lmagandi. Bunday atmosferada g‘alaba qozonish ikki hissa yoqimli.
Ruslanbek Jiyanov hali to‘liq tarkibga qo‘shilmadi. U asosiy tarkib futbolchisi, ammo jarohati bois maydonga tusha olmayotgandi. Asta sekin o‘z formasiga kirib borayapti. Hozir uni o‘yin sifatini oshirish uchun zaxiradan maydonga tushirayapmiz. Bugun ham shunday bo‘ldi. Maydonga tushishi bilan agressivlikni oshirdik. Gol urilgan vaziyatda ham asosiy ishni qilgan futbolchi aynan Jiyanov bo‘ldi. Undan shuni kutgan edik. Bugun hujum chizig‘ida va unga yaqin xududlarda o‘ynagan o‘yinchilar – Sobirjonov va Ismoilov katta hajmdagi ish qilishdi. Raqibni doim pressingda ushlab turishdi.
Navbahor hozir ikkita bir xil saviyali tarkibga ega, degan fikrga qo‘shilmayman. Neftchi bugun 5 nafar futbolchini zaxiradan maydonga tushirdi va ular o‘yinni kuchaytira olishdi. Menda esa bunday resurs yo‘q. Ha, jamoamiz bugun peshqadam. Safimizda shunga mos saviyali futbolchilar yig‘ilgan. Ammo, bizda ham yetarlicha muammolar bor. Hujumlarni yakuniga yetkazishda, balansni ushlashda muammolar bor. G‘alabalar bizga osonlikcha kelmayapti.
Bunday derbilar futbolning bezagi deyish mumkin. Derbilar futbolning ajralmas qismi. Hali Neftchiga murabbiy sifatida mag‘lub bo‘lmaganim haqidagi fakt albatta, quvonarli. Barcha o‘yinlarda g‘alaba qozonishni istaymiz. Biz bugungi o‘yin haqida emas, allaqachon navbatdagi raqibimiz – Metallurg”bilan o‘yin haqida o‘ylashni boshlashimiz kerak. Hozir faqat keyingi uchrashuv uchun tayyorgarlik haqida o‘ylayapmiz.
