Coca-Cola Superliga 26-turidan o‘rin olgan Navbahor – Neftchi (1:1) uchrashuvidan so‘ng mehmonlar bosh murabbiyi Vitaliy Levchenko o‘z fikrlarini bildirib o‘tdi.
“Barcha muxlislarni tabriklayman. Ular yuqori klassdagi futbol guvohi bo‘lishdi. Qo‘shimchasiga mavsumning yakunida derbi. Bu derbida ko‘plab emotsiyalar maydonda va har ikkala jamoa murabbiylar o‘tiradigan zaxira o‘rindig‘ida ham shunday holat kuzatildi. Haqiqiy futbol bayrami kuzatildi, barcha qoniqdi. G‘alabani xohlagan bo‘lsak-da, yakunda durang bilan yakuniga etdi. Natija adolatli bo‘ldi. Birinchi davradagi o‘yinda ham durang qayd etilgandi. Jamoalarni kuchlari teng darajada ekanligini ko‘rsatib berdi.
Birinchi o‘rinda shuni aytishim kerakki, bu yerda ko‘p narsa o‘yinchini o‘ziga bog‘liq. Futbolchi jamoada o‘ynashni istamasa misol uchun “Neftchi”dami Namangandami, uni ushlab turishdan nima naf bor? Bunday futbolchida ishtiyoq bo‘lmaydi. Tabatadzening namangalikliklarga ko‘proq foydasi tegdi. Navbahor chempionlik uchun kurashadigan klub. Jamoa oldiga yaxshi vazifalar qo‘yilgan edi, agar xohish bo‘lmasa futbolchini ushlab turish kerak emas. O‘ynashga ishtiyoqi bormi, marhamat o‘ynatamiz. Agar aksincha bo‘lsa uni ushlab turmaymiz.
Liga klublardagi sharoitlarni yaxshilashga harakat qilib kelyapti. Futbol bosqichma-bosqich rivojlanyapti. O‘zbekistonda futbolga bo‘lgan e’tibor meni quvontiryapti. O‘yinga kelsak, nimadir o‘xshadi, nimadir o‘xshamadi. Birinchi taymda faolroq bo‘ldik va gol ham urdik. Ikkinchi bo‘limda esa boshqacharoq harakat qildik. Navbahor’da yetakchi o‘yinchi paydo bo‘ldi va barchasini o‘z qo‘liga oldi. Birinchi bo‘limda Oston O‘runov o‘rtada o‘ynadi. Ikkinchi bo‘limda esa o‘zining sevimli nuqtasiga o‘tdi. U qiyin holatga solib qo‘ydi, deb o‘ylayman. Gol ham o‘tkazib yubordik. Ammo yomon o‘ynamadik.
Adhamzoda uchrashuvdan avval shamollab qolgandi. Dori-ukollar berdik. Avvalo, uning sog‘ligini o‘yladik. Shamollab qolgani bois qaydnomaga kiritmadik. Uning jamoa bilan bir yillik shartnomasi bor. Kimdir sotib olmoqchi bo‘lsa, muzokara o‘tkazishga tayyormiz.
Eng yaxshi o‘yinlarimiz oldinda. Yomon o‘yinlarimizni hali tahlil qilib ko‘rmadik. Yomon o‘yinlarni hozircha keng ommaga oshkor qila olmayman.
Paxtakorga qarshi yorqin o‘yin bo‘ldi, deb o‘ylayman. Turnir jadvalidagi yuqoridagi klublar bilan yaxshi o‘yin ko‘rsatdik.
Navbahor Hindistonda mag‘lubiyatga uchramasa ko‘zlagan maqsadiga erishishi mumkin. Jamoaning imkoniyatlari yuqori. Barchasi o‘z qo‘lida. Sifatli o‘yin ko‘rsatishsa, natija ham bo‘ladi”, – dedi Levchenko.
