7-fevral kuni Superliganing 2023-yilgi mavsumi uchun qur’a tashlandi. Shu asosda avvaldan rejalashtirilgan taqvimga aniq sanalarni kiritish ishlari boshlandi.
Mart oyining 20-28 sanalari FIFA kunlari sifatida belgilab olingan. O‘zbekiston milliy va olimpiya terma jamoalari uning doirasida xalqaro safar o‘yinlarida ishtirok etadi. Qolaversa, 1-18 mart kunlari mamlakatimizning 4 ta stadioni U20 Osiyo kubogiga mezbonlik qiladi. Sir emaski, yana 4 ta stadion ta’mirlash ishlari sabab mavsumga tayyor emas.
Mana shunday mushkul vaqtda O‘FA taqvim masalasida iltimos bilan chiqqan. Unga ko‘ra:
• milliy terma jamoaga futbolchi beradigan uch asosiy klub: “Paxtakor”, “Nasaf” va “Navbahor”ning 3-turdagi o‘yinlari 17-mart sanasiga qo‘yilishi kerak;
• Marokashga yo‘l olayotgan olimpiya termasining rejasidan kelib chiqib, “Olimpik” ishtirokidagi o‘yin ham iloji boricha ertaroq o‘tishi kerak.
Superliga o‘yinlari futbol muxlislariga qulaylik qilish maqsadida juma, shanba va yakshanba kunlariga reja qilingan. Bunda FIFA kunlari inobatga olingan. Qo‘shimchasiga, Liga 18-mart kuni Toshkentda o‘yin tashkil qila olmaydi. Shu kuni U20 Osiyo chempionatining so‘nggi ikki uchrashuvi bo‘lib o‘tadi.
Barcha holatlarni inobatga olib, Liga dastlabki uch turning faqatgina 5 ta o‘yinida o‘zgarishlar qildi. Bu haqda qur’a oldidan futbol jamoatchiligiga ham aytib o‘tilgandi. Demak:
• 1-tur doirasida safarda o‘ynashi kerak bo‘lgan “Nasaf” va “Surxon” jamoalari nominal mezbonga aylanadi (ularning raqibi bo‘lgan “Andijon” va OKMK uy uchrashuvlarini o‘tkazadigan stadion xalqaro musobaqa bilan band);
• 2-tur doirasidagi “Bunyodkor” — OKMK o‘yini keyinroq o‘tkaziladi (Katanes milliy termaga chaqiruv olgan futbolchilar ro‘yxatini e’lon qilishiga qarab mazkur bellashuv yo FIFA kunida yoki aprel oyidagi bo‘sh kunlardan birida o‘tadi);
• 2-tur doirasida safarda o‘ynashi kerak bo‘lgan “So‘g‘diyona” jamoasi ham nominal mezbonga aylanadi (jizzaxliklarning raqibi bo‘lgan “Olimpik” jamoasi uy uchrashuvlarini o‘tkazadigan stadion xalqaro musobaqa bilan band);
• 3-tur doirasidagi safarda o‘ynashi kerak bo‘lgan “Olimpik” nominal mezbonga aylanadi (o‘yin “Jar” stadionida o‘tadi).
Kunning qolgan qismida Liga keyingi turlar masalasiga ham oydinlik kiritadi.
1-tur
3-mart, juma
Paxtakor – Olimpik
Metallurg – Neftchi
4-mart, shanba
Navbahor – Qizilqum
Nasaf – Andijon
So‘g‘diyona – Bunyodkor
5-mart, yakshanba
Turon – Buxoro
Surxon – OKMK
2-tur
10-mart, juma
So‘g‘diyona – Olimpik
Neftchi – Paxtakor
11-mart, shanba
Navbahor – Metallurg
Surxon – Andijon
12-mart, yakshanba
Qizilqum – Buxoro
Nasaf – Turon
Noma’lum muddatga qoldirildi
Bunyodkor – OKMK
3-tur
17-mart, juma
Olimpik – OKMK
Buxoro – Nasaf
Paxtakor – Navbahor
18-mart, shanba
Andijon – Bunyodkor
So‘g‘diyona – Neftchi
19-mart, yakshanba
Metallurg – Qizilqum.
Turon – Surxon.
