Surxondaryo markazi Termiz shahrida 2-liga g‘oliblari o‘rtasida Birinchi ligaga o‘tish turniri nihoyasiga etdi. Turnirning final ishtirokchilari hamda uchinchi o‘rin egasi 2022-yilgi mavsum Birinchi ligaga yo‘llanma olishini inobatga olsak, uchta omadli jamoaning nomi ma’lum bo‘lib ulgurdi.
Yarim finalning birinchi uchrashuvida Surxondaryo viloyatining ikki vakili – “Qumqo‘rg‘on” va “Denov” jamoalari o‘zaro kuch sinashishdi va denovliklar 2:1 hisobida g‘alaba qozonib, Birinchi liganing dastlabki ishtirokchisiga aylandi. Ikkinchi uchrashuv ikki “Do‘stlik” jamoasi o‘rtasida kechdi. Aslida birinchi bo‘lib toshkentliklar hisobni ochishgandi. Ikkinchi bo‘limning yarmida oltiariqliklar hisobni tenglashtirdi. Yakunda esa Oltiariqning “Do‘stlik” jamoasi 3:2 hisobida yutuqqa erishib, Birinchi liganing ikkinchi vakili bo‘ldi.
Birinchi ligaga uchinchi yo‘llanma “Qumqo‘rg‘on” va Toshkentning “Do‘stlik” jamoalari o‘rtasidagi bahsda ma’lum bo‘lishi lozim edi. Teng kurashlar ostida o‘tgan uchrashuvning so‘nggi daqiqalarida qumqo‘rg‘onliklar poytaxtlik raqiblari darvozasini ishg‘ol etishning uddasidan chiqishdi va Birinchi liganing uchinchi jamoasi bo‘ldi.
Shu tariqa, 2022-yilgi mavsum Birinchi ligasida “Denov”, “Do‘stlik” (Oltiariq) va “Qumg‘o‘rg‘on” jamoalari ishtirok etadi. Musobaqaning hal qiluvchi final o‘yinida oltiariqliklar denovliklarni yirik 8:3 hisobida mag‘lub etib, o‘tish turniri g‘olibligini qo‘lga kiritishdi.
