Avvalroq xabar berilganidek, O‘zPFL hamda UZREPORT TV kelishuviga ko‘ra Pro liganing har bir turidan eng qiziqarli va markaziy uchrashuvlarni UZREPORT TV va FUTBOL TV telekanallari orqali jonli efirda namoyish etishi ko‘zda tutilgan.
Shu bois, O‘zPFL hamda UZREPORT TV ishchi guruhi tanaffusdan foydalanib Pro liga uchrashuvlari o‘tkaziladigan stadionlarni tekshirishni boshlagan edi. Oldinroq ishchi guruh “Oqtepa” futbol klubi to‘p suradigan Toshkentdagi “To‘qimachi” stadionini borib ko‘zdan kechirgan edilar. 20 avgust kuni ishchi guruh Farg‘ona viloyatiga tashrif buyurib, Pro ligada qatnashadigan viloyat jamoalari – “Istiqlol”, “Neftchi” hamda “Turon” futbol klublari o‘ynaydigan stadionlarni ko‘zdan kechirishdi.
Ta’kidlash lozim, Farg‘ona shahridagi “Istiqlol”, “Kirguli” hamda Yaypandagi “O‘zbekiston” stadioni Pro liga talablariga to‘liq javob beradi. Stadionlardagi internet tezligi, kamera joylashtirish uchun nuqtalar, shuningdek OAVga yaratilgan sharoitlar tekshirildi. Ularga bu borada kerakli ko‘rsatmalar va tavsiyalar berildi.
