Pepsi Superliga klublarning shtat jadvalida o`zgarishlar bo`ladi

Professional futbol ligasi Pepsi Superligasi klublari oldiga yangi talab qo`ydi. Bunda jamoalar shtat birligini qayta ko`rib chiqish kerak bo`ladi.

Shu vaqtga qadar klublar o`zi bilganicha faoliyat olib borgan bo`lib, ularning shtat birligi bir-biridan keskin farq qilib kelgan. Superliganing ayrim klublari davlat korxonalari tomonidan moliyalashtirilishidan kelib chiqib, O`FA shtat birligi masalasiga jiddiy e`tibor qaratdi. Natijada Professional futbol ligasi ham OFK talablarini inobatga olib, yuqoridagi masalani tartibga solishga qaror qildi.

Endilikda klub prezidenti va vitse-prezidenti faxriy lavozim bo`lib, asosiy ish Bosh direktor orqali boshlanadi (bosh menejer, ijrochi direktor, bosh maslahatchi emas). Bosh direktor fonida jami 24 kishi klub ishlarini yuritadi:

1. Bosh direktor

a) Bosh direktor o`rinbosari

b) Klub kotibi

4. Bosh buxgalter

a) Etakchi buxgalter

b) Hisobchi

7. Matbuot kotibi

a) Sayt administratori

b) Fotograf

v) Operator

11. Marketing masalasida menejer

a) Marketolog

b) Fan-klub menejeri

14. Texnik direktor

15. Sport direktori

16. Litsenziyalash masalasida menejer

17. Xavfsizlik masalasida menejer

18. Xalqaro masalalar bo`yicha menejer

a) Xalqaro bo`lim mutaxassisi

20. Kadrlar masalasida menejer

21. Yuristkonsult

22. Xo`jalik ishlari menejeri

23. Haydovchi (engil mashina)

24. Haydovchi (avtobus)

Endilikda klubning mas`ul xodimlari o`z ishiga puxta yondoshishi talab etiladi. Shu vaqtgacha matbuot xizmati vakillari o`z yumushidan tashqari litsenziyalashga ham, boshqa masalalarga ham yugurib kelavergan. Endilikda PFL har bir vazifa uchun faqatgina shu ish uchun mas`ullardangina hisobot talab qiladi. Matbuot kotibi yoki boshqa ishchi ayni bir mas`ul xodimning vazifalarini bajarmaydi. Ya`ni, hamma o`z ishi uchun javob beradi. 

Shuningdek, endilikda yuqoridagi xodimlarning oylik-maoshlari masalasi ham nazorat qilinadi. Bir xil vazifani bajargani holatida ikki bosh direktorning biri 80 million, ikkinchisi 8 million maosh olmaydi. Bosh direktor o`z ishiga professionallarcha yondoshib, o`zi jamoa uchun qo`shimcha homiylar, daromad olib kelganidagina qo`shimcha rag`batlantirilishi mumkin (shuningdek, mukofot pullarining berilish tartibi ham alohida ko`rib chiqiladi). 

Xodimlar ishdan bo`shatilganida klub va ishchi o`rtasidagi shartnoma, undagi talablar, kelishuvlar albatta PFL tomonidan ham ko`rib chiqiladi. Ya`ni, biror-bir xodimga nisbatan nohaqlik qilinishiga yo`l qo`yilmaydi. Ishchi-xodimning qanday faoliyat olib borishi, qanday sifat bilan ishlashi bosh direktorning hukmiga havola.

PFL bu erda akademiya va stadion ishchilarini ko`rsatmagan. Stadionlar masalasi alohida-alohida hal etiladi. Akademiya bo`yicha xuddi shunday shtat jadvalini Superliga klublari yaqin orada qabul qilib oladi. Akademiya murabbiylarining ishi klub texnik direktori tomonidan muvofiqlashtiriladi.

Xususiy klublar ish o`rinlarini o`zi istaganicha ko`paytirishi va ishchilarga o`zi bilganicha oylik-maoshlar tayin qilishi mumkin. Ammo PFL ulardan ham yuqoridagi kabi mas`ul xodimlar ro`yxatini talab qilib oladi.

Yuqoridagilar O`zbekiston Respublikasi Mehnat kodeksining 100-modda 1-bandiga ko`ra amalga oshiriladi. Klublar ishni tartibga solishda shu kodeksining 102-moddasi 1-bandidan kelib chiqib, ishchilarini ikki oy avval ogohlantiradi.

PFL bu boradagi hisobotlarni 15 iyul — transfer oynasi yopilguniga qadar qabul qiladi. Shtatlar o`zgarganini esa 15 sentyabrdan boshlab tekshiruvdan o`tkazadi. Klublarning avvaldan tasdiqlangan yillik smetasiga og`irlik tushmasligi uchun shu vaqtgacha faoliyat yuritmayotgan xodimlarni ishga qabul qilish 2019 yilning yanvarida amalga oshiriladi. 

Shu masalalar yuzasidan PFL barcha savollarga javob berishga tayyor.